Króatíski handknattleiksmarkvörðurinn Filip Ivic, sem rekinn var frá serbneska handknattleiksliðinu RK Vojvodina fyrr í vikunni eftir að hafa sótt tónleika með umdeildri króatískri hljómsveit, segist hafa farið á tónleikana til að heiðra minningu kærs vinar, Nikola Pokrivača, sem lést fyrr á árinu í bílslysi. Lög sveitarinnar hafi verið í uppáhaldi hjá Pokrivača, ekki síst það sem fjallar um samstöðu Króata. Saman hafi þeir oft sótt tónleika.
„Ég var alinn upp við að elska land mitt en um leið að virða aðra og skoðanir þeirra. Á ferli mínum hef ég haft þann heiður að vera í liði og á leikvelli með leikmönnum af mörgum þjóðernum, trúarbrögðum og pólitískum skoðunum. Við áttumst við á vellinum, í anda heiðarlegs leiks, en fyrir utan völlinn erum við vinir,” segir Ivic í yfirlýsingu sem hann sendi frá sér í gær.
„Neikvæð túlkun á viðveru minni á tónleikunum – fyrir utan að njóta laga sem sameinar fólk og heiðra minningu vinar míns – eru ástæðulaus,“ segir Ivic og bætir við hann virði rétt stjórnenda RK Vojvodina til þess að taka ákvarðanir út frá hagsmunum félagsins.
„Ég óska RK Vojvodina og fyrrverandi samherjum mínum alls hins besta.
Ég mun áfram að berjast fyrir gildum íþróttanna í anda Ólympíuandans og leitast við um leið að vera trúr mínum gildum sem atvinnumaður í íþróttum, vera með opið hjarta og jákvæðan huga. Ég elska föðurland mitt, þjóð mína og trú,“ segir ennfremur í tilkynningu Ivic um leið og hann tekur fram að hann ætli ekki frekar að tjá sig um málið.
