Spánverjar settu strik í reikning Frakka í kvöld í milliriðlakeppni Evrópumóts karla í handknattleik er þeir lögðu granna sína á sannfærandi hátt, 36:32, í Jyske Bank Boxen. Úrslitin kunna að verða til þess að Evrópumeistarar Frakka komist ekki í undanúrslit. Frakkar mæta Þjóðverjum í síðustu umferð á miðvikudaginn og verða að vinna en vonast einnig til þess að Þjóðverjar öngli ekki a.m.k. í eitt stig úr viðureign við Dani í kvöld.
Ef Þjóðverjar ná í eitt stig gegn Dönum þá verða Frakkar þremur stigum á eftir þýska liðinu fyrir lokaumferðina. Frakkar standa auk þess höllum fæti gagnvart Dönum eftir tap fyrir þeim síðasta fimmtudag.
Að sama skapi eru Danir öruggir í undanúrslit ef þeir leggja Þjóðverja í kvöld.
Spánverjar hafa ekki riðið feitum hestum frá tveimur fyrstu leikjum sínum í milliriðlakeppninni, töpuðu fyrir Noregi og Danmörku. Þeir hertu upp hugann í kvöld og voru sterkari frá upphafi til enda leiksins við Frakka. M.a. var sex marka munur í hálfleik, 20:14.
Ian Barrufet skoraði 10 mörk fyrir spænska landsliðið og Jan Gurri og Aleix Gómes skoruðu fimm mörk hvor.
Aymeric Minne skoraði sjö sinnum fyrir Frakka og Hugo Descat var með fimm mörk.
