„Undir lokin fengum við tækifæri til þess að hirða annað stigið en nýttum það ekki. Heilt yfir hvernig við lékum síðari hálfleik var frábærlega gert og margt sem við lærum af og tökum með okkur inn í framhaldið,“ sagði Arnar Pétursson landsliðsþjálfari í handknattleik kvenna þegar handbolti.is hitti hann að máli í morgun við hótel íslenska landsliðsins í Stuttgart. Rétt rúmu hálfur sólarhringur var þá liðinn frá tapinu nauma fyrir Serbum, 27:26. Fram undan er á morgun úrslitaleikur við Úrúgvæ um sæti í milliriðlakeppni HM klukkan 14.30.
Arnar sagði að íslenska liðið hafi lengi vel verið í brekku í leiknum og m.a. verið sjö mörkum undir, 21:14, snemma í síðari hálfleik. „Við vorum í töluverðu basli með vörnina og ég tek það á mig að við lögðum of mikla áherslu á Cvijic á línunni sem varð til þess að við tókum ekki þau aukaskref fram í vörninni sem þurfti til að mæta í bardagann.
Allt þetta ræddum við í hálfleik og hlutirnir bötnuðu mikið auk þess sem Hafdís var frábær í markinu. Við spóluðum okkur upp brekkuna og gerðum ofboðslega vel. Af því er ég stoltur. Liðið sýndi þroska og karakter,“ sagði Arnar enn fremur.
Lengra viðtal við Arnar er í myndskeiði ofar í þessari grein.
A-landslið kvenna – fréttasíða.
HM kvenna ”25 – dagskrá, riðlakeppni, úrslit
Landslið Íslands á HM kvenna 2025
