Staðfest hefur verið að Hafsteinn Óli Berg Ramos Rocha leikmaður Gróttu er í 20 manna hópi landsliðs Grænhöfðaeyja sem tekur þátt í heimsmeistaramótinu í handknattleik karla í næsta mánuði. Grænhöfðeyingar verða fyrsti andstæðingur íslenska landsliðsins í riðlakeppni HM í Zagreb 16. janúar. Valinn hefur verið hópur 20 leikmanna. Er nafnalistinn birtur hér fyrir neðan.
Eins og kom fram í samtali við Hafstein Óla á handbolti.is í nóvember þá æfði hann og keppti í fyrsta sinn með landsliði Grænhöfðaeyja í byrjun nóvember. Gekk svo vel að líkindi voru góð til að Hafsteinn yrði valinn í HM -hópinn sem nú er orðin raun á. Faðir Hafsteins Óla er frá Grænhöfðaeyjum.
Síðasta sumar komst á samband milli Hafsteins Óla og forráðamanna handknattleikssambands Grænhöfðaeyja sem leitt hefur til þess að hann er á leiðinni á HM með landsliðinu sem vann sér inn þátttökurétt á þriðja heimsmeistaramótinu í röð.
Ísland og Grænhöfðaeyjar mættust á HM 2023 í Gautaborg fyrir tveimur árum. Íslenska landsliðið vann leikinn með 10 marka mun, 40:30.
HM karla 2025 – leikdagar, leikstaðir, leiktímar
Einn frá Herði
Meðal annarra sem er að finna í landsliðshópi Grænhöfðeyinga er Admilson Furtado leikmaður Harðar á Ísafirði, Ivo Santos sem leikur undir stjórn Arnórs Þórs Gunnarssonar hjá þýska liðinu Bergischer HC og samherji Þorsteins Leós Gunnarssonar hjá Porto, Malvino Varela.
Leikmannahópur Grænhöfðaeyja á HM:
Reyndar er Hafsteinn Óli skráður í Aftureldingu í skjalinu að ofan. Nokkur ár eru liðin síðan hann lék síðast með Aftureldingu. Hafsteinn Óli gekk til liðs við Gróttu í sumar frá HK.
