„Úr því sem komið var þá var jafntefli viðunandi niðurstaða en þetta var ævintýralegur endir. Tvö mörk á hálfri mínútu meðan við skoruðu þrjú mörk á fyrstu 15 mínútunum í fyrri hálfleik,“ sagði Elvar Örn Jónsson landsliðsmaður í handknattleik í samtali við handbolta.is eftir jafntefli, 27:27, í upphafsleik íslenska landsliðsins á Evrópumótinu í handknattleik í München í kvöld.
„Einar Þorsteinn kom með góða innkomu á síðustu tveimur mínútunum. Hann er góður í stela boltanum, kemur úr körfuboltanum og er vanur þessu,“ sagði Elvar Örn.
Elvar bætti við að mótlætið sem liðið varð fyrir í sóknarleiknum í síðari hálfleik hafi dregið mátt úr leikmönnum sem það átti ekki að gera. „Mér fannst Serbarnir komast oft mikið í okkur, við náðum ekki að stilla fjarlægðina á milli okkar og varnarmannanna nógu vel. Þeir fengu að negla okkur. Síðan þegar við fengum færi þá klikkuðum við. Of mörg vítaköst fóru í súginn. Til viðbótar þá gekk okkur mjög illa að nýta þá stöðu að vera manni fleiri,“ sagði Elvar Örn og bætti við.
„Þetta stig getur reynst okkur dýrt en það getur líka verið dýrmætt.“
Lengra hljóðritað viðtal við Elvar Örn er að finna hér fyrir neðan.
Þegar vonin ein var eftir – ævintýralegt jafntefli
Varð bara að drífa mig fram – vissi ekki hvað var mikið eftir
