„Eftirvænting fyrir að komast inn á völlinn er mikil hjá okkur eftir langa bið. Menn hafa svo sem verið að bíða síðan við lékum síðasta í deildinni gegn Fram 3. október,“ segir Kristinn Björgúlfsson, þjálfari karlaliðs ÍR, sem hefur keppni í Olísdeildinni í kvöld. ÍR sækir þá Gróttu heim í Hertzhöllinn á Seltjarnarnesi. Flautað verður til leiks klukkan 18.
Eftir 117 daga hlé þá segir Kristinn ljóst að ÍR-ingar eins og aðrir renni blint í sjóinn með stöðuna á leikmönnum og liðinu. „Áhugavert verður sjá að sjá hvernig þetta þróast í ljósi langrar biðar. Ekki er víst að gæðin verði mikil hjá liðunum fyrst til að byrja með en það er aukaatriði. Stigin tvö skipta máli fyrir bæði lið í leiknum í kvöld,“ segir Kristinn ennfremur.
ÍR er stigalaust eftir fjóra leiki á botni Olísdeildarinnar. Grótta er á hinn bóginn með tvö stig eftir tvö jafntefli í haust, við Stjörnuna á heimavelli og KA fyrir norðan. Grótta hefur auk þess leikið einn leik eftir að keppni í Olísdeildinni hófst á ný um síðustu helgi. Grótta steinlá fyrir FH og vill örugglega reka af sér slyðruorðið á heimavelli í kvöld.
Kristinn segir ástandið á sínum leikmannahópi vera gott. „Allir eru heilir og við mætum með okkar sterkustu sveit á Nesið í kvöld og leggjum okkur alla fram,“ sagði Kristinn Björgúlfsson, þjálfari ÍR við handbolta.is í hádeginu.
Leikir kvöldsins:
Olísdeild karla:
Hertzhöllin: Grótta – ÍR, kl. 18 – sýndur á Stöð2sport.
KA-heimilið: KA – Afturelding, kl. 19.30 – sýndur á Stöð2sport.
Framhús: Fram – Valur, kl. 19.30, sýndur á FramTV.
Olísdeild kvenna:
TM-höllin: Stjarnan – Haukar, kl. 19.30, sýndur á 210tv.is.
Grill 66-deild kvenna:
Fylkishöll: Fjölnir-Fylkir – Víkingur, kl. 19.15.
