Selfoss féll úr Olísdeildinnni í handknattleik í gærkvöld og strax í morgun var tilkynnt að einn leikmanna liðsins, Hans Jörgen Ólafsson, ætli ekki að sækja á mið Grill 66-deildarinnar á næsta keppnistímabili. Hann hefur samið við Stjörnuna, eftir því sem fram kemur á Facebook-síðu Garðabæjarliðsins. Ekki kemur fram hvað Hans Jörgen hefur samið til langs tíma við Stjörnuna.
Alhliða leikmaður
Hans Jörgen er fæddur árið 2004 og uppalinn á Selfossi. Hann er kröftug skytta sem getur leyst allar stöður varnarlega. Einnig hefur hann verið fastamaður í yngri landsliðum Íslands og m.a. síðast í U19 ára landsliðinu sem tók þátt í HM sem fram fór í Króatíu í ágúst á síðasta ári.
Hans Jörgen hefur skorað 67 mörk fyrir Selfoss í 21 leik í Olísdeildinni á keppnistímabilinu.
Hrikalega ánægður þjálfari
„Ég er hrikalega ánægður með að hafa fengið Hans til okkar í Stjörnuna. Hans er mikil fyrirmynd fyrir okkar yngri leikmenn hvernig á að æfa og leggur mikið á sig. Hans er mikil styrking fyrir okkur og verður hriklalega gaman að sjá Hans í Stjörnubúning næsta vetur,“ segir Hrannar Guðmundsson þjálfari karlaliðs Stjörnunnar í tilkynningu.
