Heimsmeistarar Danmerkur kjöldrógu Hollendinga í annarri umferð alþjóðlega handknattleiksmótsins í Þrándheimi í dag, lokatölur, 40:24. Í síðari viðureign dagsins unnu Norðmenn færeyska landsliðið örugglega, 34:26. Miklu munaði fyrir Færeyinga að frændurnir Óli Mittún og Elias Ellefsen á Skipagøtu fengu frí en þeir eru án efa tveir bestu handknattleiksmenn Færeyinga um þessar mundir. Frændurnir mæta eflaust til leiks á morgun þegar Færeyingar mæta Dönum.
Danir hafa unnið tvo fyrstu leiki sína á mótinu. Hollendingar og Norðmenn hafa einn vinning hvor og Færeyingar eru án sigurs.
Danir voru fimm mörkum yfir í hálfleik gegn Hollendingum, 20:15. Í síðari hálfleik sló danska liðið upp flugeldasýningu. Sóknarleikurinn var áfram frábær en við bættist öndvegis varnarleikur og finn leikur hjá Kevin Møller í markinu. Hollendingar skoruðu aðeins níu mörk í síðari hálfleik en Danir ríflega tvöfalt fleiri mörk.
Emil Jakobsen skoraði 11 mörk og Simon Pytlick sex mörk. Rutger Ten Velde var markahæstur hjá hollenska landsliðinu með sex mörk.
Voru marki yfir í hálfleik
Simen Lyse var atkvæðamestur í norska landsliðinu með átta mörk í öruggum sigri, 34:26, á færeyska landsliðinu sem var eins og áður segir ekki með sína öflugustu leikmenn. Tobias Grøndahl skoraði sjö mörk. Norðmenn voru marki yfir í hálfleik, 16:15.
Roi Ellefsen á Skipagøtu var markahæstur í færeyska landsliðinu með fimm mörk eins og Hákun West Av Teigum. Pauli Mittun og Vilhelm Poulsen, fyrrverandi leikmaður Fram, skoruðu fjögur mörk hvor. Valsarinn Allan Norðberg skoraði tvisvar.
