Haukar komust upp að hlið Aftureldingar í efsta sæti Olísdeildar karla í handknattleik með stórum og öruggum sigri á ÍBV, 39:29, í íþróttamiðstöðinni í Vestmannaeyjum í dag. Um var að ræða síðasta leik sjöttu umferð deildarinnar. Haukar hafa þar með 10 stig eins og Aftureldingarmenn en Valur og KA eru þar á eftir með tveimur stigum færra. ÍBV er í sjötta sæti með sex stig.
Haukar voru mun öflugri en Eyjamenn frá upphafi viðureignarinnar í dag. Þeir léku vörn ÍBV afar grátt og skoruðu 20 mörk í fyrri hálfleik en ÍBV 13.
Fljótlega í síðari hálfleik varð ljóst að Haukar ætluðu ekki að slaka á klónni. Þegar Hergeir Grímsson kom Hafnarfjarðarliðinu í tíu marka forskot, 29:19, með sirkusmarki eftir sendingu frá Birki Snæ Steinssyni má segja að sigurinn hafi verið innsiglaður. Mestur varð munurinn 12 mörk hvað eftir annað á síðasta stundarfjórðungi viðureignarinnar.
Birkir Snær Steinsson fór hamförum í sóknarleik Hauka og skoraði alls 10 mörk með þrumufleygum í 12 skotum og gaf auk þess þrjár stoðsendingar. Eyjamenn réðu ekkert við örvhentu skyttuna sem sprungið hefur út á þessu keppnistímabili. Adam Haukur Baumruk var traustur í vörninni.
Mörk ÍBV: Elís Þór Aðalsteinsson 10/6, Andri Erlingsson 7, Kristófer Ísak Bárðarson 4, Sveinn José Rivera 3, Dagur Arnarsson 2, Sigtryggur Daði Rúnarsson 2, Hinrik Hugi Heiðarsson 1.
Varin skot: Petar Jokanovic 8, 22,2% – Morgan Goði Garner 0.
Mörk Hauka: Birkir Snær Steinsson 10, Hergeir Grímsson 7/5, Andri Fannar Elísson 5, Skarphéðinn Ívar Einarsson 4, Össur Haraldsson 4, Ólafur Ægir Ólafsson 3, Þráinn Orri Jónsson 2, Ásgeir Bragi Bryde Þórðarson 1, Brynjólfur Snær Brynjólfsson 1, Freyr Aronsson 1, Sigurður Snær Sigurjónsson 1.
Varin skot: Magnús Gunnar Karlsson 9/1, 30% – Ari Dignus Maríuson 1, 11,1%.
Tölfræði leiksins hjá HBStatz.
Staðan og næstu leikir í Olísdeildinni.
