Heimsmeistarar Danmerkur áttu ekki í vandræðum með að vinna gríska landsliðið í síðari viðureign liðanna á æfingamóti í Almere í Hollandi í dag. Danska landsliðið vann með 14 marka mun, 38:24, eftir að hafa verið sjö mörkum yfir að loknum fyrri hálfleik, 17:11.
Nikolaj Jacobsen landsliðsþjálfari Danmerkur nýtti breiddina í leikmannahópnum sínum í leiknum og dreifði álaginu afar vel á milli leikmanna. M.a. þótti hinn ungi Mads Svane eiga góð spretti og skoraði m.a. sex mörk í fyrri hálfleik.
Danir lögðu Norðmenn, 34:26, á fimmtudagskvöld á mótinu í Hollandi.
Danska landsliðið verður í riðli með Portúgal, Rúmeníu og Norður-Makedóníu á EM. Fyrsti leikur Dana verður gegn Norður-Makedóníu á föstudagskvöld í Jyske Bank Boxen-íþrótta- og sýningahöllinnni í Herning á Jótlandi.
Fara ekki á EM
Grikkir verða ekki með á EM. Þeir voru með íslenska liðinu í riðli í undankeppninni en sátu eftir að henni lokinni ásamt Bosníu. Auk Íslands fór Georgía áfram úr riðlinum.
EM karla 2026 – leikdagar, leikstaðir, leiktímar
