Sandra Erlingsdóttir og samherjar hennar í TuS Metzingen komust nokkuð léttilega áfram í næstu umferð þýsku bikarkeppninnar í handknattleik í kvöld. TuS Metzingen vann SG Kappelwindeck/Steinbach, 43:19, á útivelli eftir að hafa verið átta mörkum yfir að loknum fyrri hálfleik, 21:13.
Sandra stóð fyrir sínu í leiknum. Hún skoraði fjögur mörk í sex tilraunum. Auk þess átti Sandra fjórar stoðsendingar. Stalla Söndru, Anna Frankova, notaði tækifærið, lék lausum hala, og skorað 12 mörk.
TuS Metzingen komst í undanúrslit í bikarkeppninnar í vor.
Úr leik
Liðsfélagar Díönu Daggar Magnúsdóttur í BSV Sachsen Zwickau eru úr leik í bikarkeppninni. BSV Sachsen Zwickau tapaði fyrir Solingen, 26:24, í Solingen í dag. BSV Sachsen Zwickau átti undir högg að sækja í leiknum frá upphafi til enda.
Var á skýrslu
Díana Dögg var á leikskýrslu en kom ekkert við sögu. Hún hefur ekki jafnað sig að fullu síðan hún fór úr axlarlið í lok maí. Díana Dögg sagði við handbolta.is á dögunum að vonir hennar standi til að geta verið með í fyrsta leik BSV Sachsen Zwickau í 1. deildinni sem fer fram eftir viku.
