Sviss vann auðveldan sigur á Svartfjallalandi, 43:26, í lokaumferð D-riðils Evrópumóts karla í Unity Arena í Bærum í kvöld. Sviss á því möguleika á því að tryggja sér sæti í milliriðli.
Með sigrinum fór Sviss nefnilega upp í annað sæti riðilsins og endar með þrjú stig. Færeyjar eru sæti neðar með jafnmörg stig og þurfa helst jafntefli eða sigur gegn Slóveníu í kvöld. Svartfjallaland fer heim án stiga.
Færeyjar geta komist áfram tapi þær fyrir Slóveníu. Færeyingar komast áfram ef þeir skora samanlagt fleiri mörk en Sviss, samanlagt fleiri en 106 mörk.
Norður-Makedónía vann og á smá möguleika
Norður-Makedónía vann nauman sigur á Rúmeníu, 24:23, í lokaumferð B-riðils í Jyske Bank Boxen í Herning í Danmörku og eygir smá von um að komast í milliriðil.
Norður-Makedónía er í þriðja sæti með þrjú stig, jafnmörg og Portúgal sæti ofar. Portúgal mætir Danmörku í kvöld og tapi Portúgal nógu stórt getur Norður-Makedónía farið áfram á markatölu.
Portúgal er sem stendur með sex mörk í plús en Norður-Makedónía með 11 mörk í mínus.
Fyrsti sigur Ítalíu í 28 ár
Loks vann Ítalía glæsilegan sigur á Póllandi, 29:28, í lokaumferð F-riðils í Kristianstad Arena í Kristianstad.
Um fyrsta sigur Ítalíu á Evrópumóti í 28 ár er að ræða en þá tóku Ítalir einmitt þátt á Evrópumóti í fyrsta sinn og tóku þátt í annað sinn í ár.
Ítalía lýkur því leik í þriðja sæti F-riðils með tvö stig og Pólland heldur heim á leið án stiga.
