Susan Ines Barinas Gamboa, leikmaður Aftureldingar, hefur skrifað undir nýjan tveggja ára samning við félagið. Susan, sem er frá Venesúela, hefur leikið með liði Aftureldingar undanfarin sex ár.
Hún er 37 ára gömul og er nú samningsbundin félaginu til sumarsins 2028. Oftast nær leikur hún sem línumaður og er sterkur varnarmaður.
Susan getur raunar leyst nokkrar stöður á vellinum og fór til að mynda í markið í leik með Aftureldingu gegn ÍBV fyrir nokkrum árum síðan.
Afturelding leikur í Grill 66 deildinni. Hún skoraði 81 mark í 19 leikjum fyrir liðið í deildinni á nýafstöðnu tímabili.
„Við erum stolt að því að Susan hafi ákveðið að framlengja samninginn sinn við félagið og vilji taka þátt í þeirri uppbyggingu og vegferð sem er framundan,“ sagði meðal annars í tilkynningu handknattleiksdeildar Aftureldingar.
