„Ég er bara svekktur með að hafa tapað leiknum,“ sagði Arnar Pétursson, landsliðsþjálfari í handknattleik kvenna, í samtali við handbolta.is í kvöld eftir sjö marka tap, 24:17, fyrir Norður-Makedóníu í fyrsta leik Íslands af þremur í forkeppni heimsmeistaramótsins. Leikið var í A1 Arena SC Boris Trajkovski-íþróttahöllinni í Skopje.
„Á margan hátt var leikurinn góður hjá okkur. Vörnin fín lengst af og markvarslan góð. Sóknarleikurinn var brösóttur hjá okkur, ekki síst þegar þegar á leið leikinn. Engu að síður lékum við okkur í færi en nýtingin hefði mátt vera betri,“ sagði Arnar og bætti við að fjarað hefði óþarflega hratt undan liðinu á síðustu 10 mínútum leiksins. Ísland var marki yfir, 15:14, þegar þegar síðari hálfleikur var hálfnaður.
„Við áttum að minnsta kosti möguleika á að ná betri úrslitum en raun varð á.”
Næsti leikur Íslands verður við landslið Grikklands klukkan 18 annað kvöld og sigur í þeirri viðureign kemur íslenska landsliðinu inn á rétt spor á nýjan leik. „Við mætum með höfuðið hátt í þann leik og byggjum ofan á það góða úr leiknum í dag. Það eru allir staðráðnir í að gera enn betur gegn Grikkjum,“ sagði Arnar Pétursson, landsliðsþjálfari í handknattleik kvenna í samtali við handbolta.is fyrir stundu.
