ÍR-ingar tryggðu sér oddaleik gegn Selfossi í fyrstu umferð Olísdeildar kvenna í handknattleik í dag með sigri á Selfossi í annarri viðureign liðanna, 23:22. Oddaleikurinn fer fram á Sethöllinni á þriðjudagskvöldið og verður sá fyrstu í úrslitakeppni Olísdeildanna til þessa. Sylvía Sigríður Jónsdóttir skoraði sigurmark ÍR þegar rúm mínúta var til leiksloka.
Ekki blés byrlega fyrir ÍR-liðið lengi framan af viðureigninni í dag. Selfoss-liðið var fimm mörkum yfir í hálfleik, 14:9. Þegar 12 mínútur voru liðnar af síðari hálfleik var Selfoss einnig með fimm marka forskot, 17:12. Þá blésu ÍR-ingar til sóknar og skoruðu fimm mörk í röð. Eftir það var leikurinn í járnum.
Sigríður Sylvía kom ÍR yfir, 20:19, þegar átta mínútur voru eftir. Eftir það var stál í stál og mátti vart milli sjá. Eftir að Sylvía Sigríður kom ÍR yfir úr vítakasti, 23:22, lögðu leikmenn Selfoss allt í sölurnar til þess að jafna metin og knýja út framlengingu. Allt kom fyrir ekki.
Mörk ÍR: Sylvía Sigríður Jónsdóttir 8/3, Sara Dögg Hjaltadóttir 5/2, Dagmar Guðrún Pálsdóttir 5, Ásthildur Bertha Bjarkadóttir 2, Katrín Tinna Jensdóttir 2, Hanna Karen Ólafsdóttir 1.
Varin skot: Ingunn María Brynjarsdóttir 9, 30% – Natalía Nótt Kaaber 1, 50%.
Mörk Selfoss: Hulda Dís Þrastardóttir 6/4, Katla María Magnúsdóttir 5, Harpa Valey Gylfadóttir 4, Sara Dröfn Ríkharðsdóttir 3, Elínborg Katla Þorbjörnsdóttir 3, Arna Kristín Einarsdóttir 1.
Varin skot: Ágústa Tanja Jóhannsdóttir 13/1, 36,1%.
Tölfræði leiksins hjá HBStatz
