Dómarar og eftirlitsmenn koma vel undirbúnir til leiks á Íslandsmótinu að sögn Reynis Stefánssonar, formanns dómaranefndar HSÍ. Alls munu 37 dómarar og 12 eftirlitsmenn bera hitann og þungan af störfum í kringum þá fjölmörgu leiki sem fram fara í Olísdeildum karla og kvenna og í Grill 66-deildunum tveimur.
Reynir segir engar breytingar hafa átt sér á reglum í handknattleik síðasta árið. Yfirleitt séu ekki gerðar reglubreytingar nema í kringum Ólympíuár. „Þar sem Ólympíuleikunum var frestað um ár þá voru breytingarnar lagðar til hliðar. Við hér heima hinsvegar leggjum ríka áherslu á nokkur atriði, meðal annars sem snýr að leikaraskap leikmanna og ögrun í garð dómara. Eins er það okkar markmið meðal annars að samræmi verði í aðgerðum og afleiðingum,“ sagði Reynir ennfremur.
Dómarar og eftirlitsmenn voru á fjarfundum á dögunum til þess að fara yfir áherslur tímabilsins. Eins hefur verið fundað með þjálfurum liðanna.
Helstu áherslur tímabilsins eru þessar:
• Ögrandi framkoma eftir leikbrot – sama og í fyrra.
• Bekkjarstjórnun.
• Ögrandi framkoma við hinn bekkinn (sjálfkrafa stighækkandi).
• Heimta rautt spjald (sjálfkrafa stighækkandi).
• Samskipti (leikmenn og starfsmenn).
• Líkamstjáning, flaut og bendingar.
• Covid varnir, hnerri, hósti, o.s.frv. óíþróttamannsleg framkoma.
• Barátta línumanns og varnar.
• Leikaraskapur.
• Ruðningur.
• Sérstaklega verið áberandi eftir ákveðna tegund af brotum þar sem leikmaður liggur eftir.
• Leikmaður/leikmenn hópast að þeim sem er brotlegur eða þeim sem brotið hefur verið á
• Lágmark 2 mínútna refsing.
• Dómarar eru á staðnum til að dæma, ekki stilla til friðar.
• Dæmi um að leikmenn geri mikið úr minniháttar brotum.
• Línumenn eða hornamenn sækja brot til að fá víti.
• Öfgafull viðbrögð við minnstu snertingu nálægt hálsi eða andliti.
• Fiska ruðning.
• Þetta vandamál er ekki eingöngu bundið við handbolta.
• Leikaraskap skal refsa með tveggja mínútna refsingu.
• Það er óheimilt að hlaupa eða stökkva á mótherja.
• Ef að varnarmaður er á hreyfingu að sóknarmanni er ólíklegt að um sóknarbrot sé að ræða (nema sóknarmaður noti hendur eða fætur gegn varnarmanni).
• Það er nánast alltaf brot á varnarmann ef varnarmaður notar hendur til að halda eða hrinda leikmanni.
• Hvar varð áreksturinn?
• Fyrir innan vítateig? Fyrir utan vítateig? Á gráa svæðinu?
• Hvernig komst varnarmaðurinn í sína stöðu?
• Þjálfurum er ekki heimilt að vera í beinu sambandi við dómara.
• Samskipti utan vallar eiga alltaf að fara í gegnum skrifstofu HSÍ eða dómaranefnd.
