Meiðsli halda áfram að herja á leikmenn í herbúðum Íslandsmeistara Vals í handknattleik. Svo kann að fara allt að fimm leikmenn liðsins sem hóf keppni í haust verði fjarverandi þegar Valsmenn sækja Hauka heim öðru sinni í átta liða úrslitum Olísdeildar á miðvikudagskvöldið. Tapi Valur leiknum verða leikmenn liðsins komnir í sumarleyfi.
Magnús Óli Magnússon meiddist á ökkla á annarri mínútu síðari hálfleiks í gær og kom ekkert meira við sögu. Ljóst er að þátttaka hans í leiknum á fimmtudaginn er kapphlaup við tímann.
Tryggvi Garðar Jónsson veiktist í leiknum við Hauka í gær.
Stiven Tobar Valencia meiddist einnig í leiknum við Hauka í gær. Ekki er ljóst ennþá hvort meiðslin eru alvarleg. Séu þau alvarleg er ekki útilokað að þau hafi ekki aðeins áhrif á þátttöku hans í næstu leikjum Vals heldur snerti þátttöku hans í landsleikjunum tveimur við Ísrael og Eistland síðar í mánuðinu.
Benedikt Gunnar Óskarsson og Róbert Aron Hostert hafa verið meiddir um lengri tíma og verða vart meira með. Sá fyrrnefndi meiddist í fyrri leiknum við Göppingen fyrir meira en mánuði. Róbert Aron hefur verið fjarverandi síðan í byrjun árs vegna brjóskloss í hálsi.
