Tandri Már Konráðsson fyrirliði Stjörnunanr hefur skrifað undir nýjan samning við handknattleiksdeild Stjörnunnar til næstu tveggja ára. Hann kom til félagsins fyrir sex árum eftir að hafa leikið í Danmörku og Svíþjóð um nokkurra ára skeið.
Tandri Már hefur verið kjölfesta Stjörnuliðsins undanfarin ár og leiðtogi þess utan vallar sem innan enda býr hann yfir mikilli reynslu og var m.a. Íslandsmeistari með HK fyrir 13 árum auk þess að hafa leikið um 30 A-landsleiki.
„Ég er gríðarlega spenntur fyrir framhaldinu með uppeldisfélaginu mínu Stjörnunni. Félagið hefur verið stór hluti af lífi mínu og það er heiður að fá að vera áfram hluti af þessari frábæru liðsheild,“ segir Tandri Már í tilkynningu handknattleiksdeildar Stjörnunnar frá í morgun.
Stjarnan, sem lék til úrslita í Poweradebikarnum í upphafi mánaðarins, er í 7. sæti Olísdeildar. Stjarnan sækir ÍR heim í næst síðustu umferð Olísdeildar á miðvikudagskvöld.
