Handknattleiksmarkvöðurinn Arnór Freyr Stefánsson hefur ákveðið að taka fram keppnisskóna á nýjan leik og ganga til liðs við uppeldisfélag sitt, ÍR. Arnór Freyr lék síðast með Stjörnunni leiktíðina 2022/2023 en dró saman seglin fyrir ári og varð markvarðaþjálfari Stjörnunnar eftir að hafa glímt við þrálát meiðsli.
Með ÍR ætlar Arnór Freyr að standa vaktina í marki liðsins í Olísdeildinni við þriðja mann auk þess að sinna þjálfun markvarða meistaraflokkanna beggja. Hann hefur þar með í hyggju að miðla reynslu sinni til ungra og efnilegra markmanna sem eru að koma upp úr yngri flokka starfinu og stíga sín fyrstu skref í meistaraflokki.
Íslandsmeistari með HK
Arnór Freyr hefur spilað með ÍR í efstu deild, HK, Aftureldingu og Stjörnunni. Íslandsmeistari varð hann með HK 2012. Arnór Freyr reyndi einnig fyrir sér í atvinnumennsku og var markvörður Randers HH í Danmörku í tvö ár, 2016 til 2018.
ÍR-ingar endurheimtu sæti sitt í Olísdeidinni á dögunum og leika þar með í deild bestu liðanna á næsta keppnistímabili.
