„Þátttaka Þorsteins á EM er í óvissu sem stendur,“ sagði Snorri Steinn Guðjónsson landsliðsþjálfari karla í handknattleik spurður um stórskyttuna Þorstein Leó Gunnarsson sem hefur verið frá keppni í mánuð vegna náratognunar. Fullkomin óvissa ríkir hvenær Þorsteinn verður klár í slaginn á ný. Engu að síður er hann innan sviga, ef svo má segja, í EM-hópnum sem valinn var í dag. Snorri Steinn segir að fara verði mjög varlega því ef bakslag verði hjá Þorsteini er víst að hætt verði með öllu þátttöku hans á EM.
„Minn draumur er að hann verði klár í slaginn með okkur í milliriðlakeppninni,“ segir Snorri Steinn enn fremur og vísar til stöðunnar á Aroni Pálmarssyni á HM í upphafi ársins. Aron fór meiddur út með landsliðinu til Króatíu, sat yfir í fyrstu leikjunum en kom inn í hópinn þegar á mótið leið og hann hafði jafnað sig að mestu.
Æfir ekki og leikur heldur ekki
„Það er alveg ljóst að Þorsteinn mun ekki æfa með okkur hér á landi og heldur ekki taka þátt í leikjunum í Frakklandi fyrir EM, 9. og 11. janúar. Vegna þess að Þorsteinn hefur ákveðna eiginleika sem enginn annar leikmaður hópsins hefur þá vil ég hafa hann í hópnum ef hann hefur náð bata þegar milliriðlakeppnin hefst 23. janúar.
„Bakslag er dýrt og ef til þess kemur þá þýðir það væntanlega að EM-þátttaka hans verður alveg úr sögunni. Þess vegna verðum við að fara mjög varlega í sakirnar,“ sagði Snorri Steinn.
Mjög góð samskipti við Porto
Vegna ýmissa fregna sagðist Snorri Steinn vilja taka fram að samskipti hans við félag Þorsteins Leó, FC Porto, hafi verið til fyrirmyndar.
„Þegar Þorsteinn meiddist lét hann okkur strax vita. Fljótlega eftir það fengum við stöðumat frá Porto. Frá fyrsta degi höfum við verið í góðu sambandi við Porto, vegna meiðslanna og meðferðarinnar sem hann er að fá. Hann er á mjög góðri leið til baka. Batinn hefur verið hraðari en reiknað var með. Það gefur mér ástæðu til bjartsýni en ég undirstrika að bakslag getur verið dýrt og því verður ekki tekin nein áhætta,“ sagði Snorri Steinn Guðjónsson landsliðsþjálfari í samtali við handbolta.is í dag.
Þorsteinn Leó er væntanlegur fljótlega til landsins og fer þá rakleitt í skoðun hjá sjúkraþjálfara og lækni landsliðsins.
