Þátttaka stórskyttunnar Þorsteins Leós Gunnarssonar með íslenska landsliðinu er í mikilli hættu eftir að hann rifnaði á nára á upphafsmínútum viðureignar Porto og Elverum í Evrópudeildinni í handknattleik karla síðasta þriðjudag. Þorsteinn Leó segir í samtali við Handkastið í dag að rifa sé í náranum og til að bæta gráu ofan á svart er einnig rifa í liðbandi í náranum.
Þorsteinn Leó hefur eftir lækni að það taki 10 vikur að jafna sig af þessu. Átta vikur eru í fyrsta leik íslenska landsliðsins á EM, gegn ítalska landsliðinu gegn Ítalíu í Kristianstad Arena, 16. janúar. Sé þetta raunin hjá Þorsteini Leó er vandséð að hann verði í eldlínunni með íslenska landsliðinu á EM því vart verður nýttur leikmaður á stórmóti sem ekki hefur leikið handknattleik mánuðum saman.
Allir sem átt hafa í nárameiðslum vita hversu erfið þau geta verið viðureignar.
