„Það er mikið meiri og betri taktur í liði Baia Mare en í Steaua sem við mættum í átta liða úrslitum,“ sagði Óskar Bjarni Óskarsson þjálfari Vals í samtali við handbolta.is í dag um væntanlegan leik Valsliðsins við rúmenska liðið Baia Mare í undanúrslitum Evrópubikarkeppninnar í handknattleik karla sem fram fer í N1-höll Valsmanna á sunnudaginn klukkan 19.30.
Lofa alvöru stemningu
Valsmenn lofa alvöru stemningu á heimavelli á sunnudaginn enda orðnir þaulvanir að standa fyrir stórleikjum í Evrópukeppni. M.a. ætla söngvararnir Jói P og Króli að keyra upp stemninguna í 11. Evrópuleik Vals á leiktíðinni. Það er ekki heldur á hverjum degi sem íslenskt félagslið á möguleika á að komast í úrslit í Evrópukeppni félagsliða.
Miðasala á Stubb.is – smellið hér.
Óskar segir lið Baia Mare leika öðruvísi handknattleik en Steaua sem Valur vann á sannfærandi hátt í átta liða úrslitum. „Meira er um árarásir og maður á mann, skotum og fintum. Við getum átt von á allt að fjörutíu árásum. Vörnin öðruvísi, sex núll sem fer út í þrjá, tvo, einn með ákveðnum leikkerfum.
Þeir eru góðir og við erum líka góðir. Það er klárlega möguleiki á að taka þá en það verður erfitt og gaman,“ sagði Óskar sem reiknar með að stilla upp sinni sterkustu sveit í leiknum að Viktori Sigurðssyni undanskildum en hann hefur verið fjarverandi um nokkurra vikna skeið vegna meiðsla.
Á góðum stað
„Við erum á góðum stað, bara nokkuð flottir,“ sagði Óskar Bjarni Óskarsson þjálfari Vals í samtali við handbolta.is.
Síðari leikurinn verður í Baia Mare, sunnudaginn 28. apríl. Samanlagður sigurvegari í leikjunum tveimur leikur til úrslita í Evrópubikarkeppninni í maí.
Nánar er rætt við Óskar á myndskeiðinu efst í fréttinni.
Sjá einnig:
