„Það hefur bara verið hrikalega gaman að taka þátt í þessu, kynnast strákunum og komast í aðeins öðruvísi bolta en maður er vanur. Hærra tempó og meiri ákefð,“ sagði markvörðurinn Einar Baldvin Baldvinsson úr Aftureldingu sem æft hefur með landsliðinu síðustu daga. Einar Baldvin er nýliði í landsliðshópnum og mun segja skilið við hann þegar æfingum lýkur hér á landi og hópurinn heldur út til Frakklands í fyrramálið.
„Þetta er allt annað en maður er vanur,“ sagði Einar Baldvin sem hefur notið þess að taka þátt í æfingunum og eflast af reynslu.
Einar Baldvin hefur verið einn öflugasti markvörður Olísdeildarinnar undanfarin ár og gert það afar gott með Gróttu og síðustu tvö tímabil með Aftureldingu. Það sem af er leiktíðinni er hann með 36,4% hlutfallsmarkvörslu að jafnaði í 11 leikjum deildarinnar samkvæmt HBStatz.
Stoltur yfir að komast á þennan stað
„Ég er stoltur yfir að komast á þennan stað að æfa með bestu leikmönnum í heimi. Maður reynir bara að gera sitt besta, aðeins betur í dag en í gær og svo framvegis,“ sagði Einar Baldvin þegar handbolti.is hitti hann stuttlega að máli fyrir æfingu landsliðsins í gærmorgun.
Spurður hvort það kitlaði ekki að ná lengra og vinna sér sæti í landsliðinu þegar fram líða stundir sagði Einar Baldvin það vitanlega vera markmið að sækja fram veginn. „Markmiðið mitt er bæta mig með hverri æfingu, hvort sem það er hér eða með Aftureldingu.“
Opinn fyrir öllu
Vangaveltur hafa verið uppi um í vetur að Einar Baldvin líti til þess að komast að hjá félagsliði í Evrópu. „Auðvitað er spennandi að kanna hversu langt maður kemst. Ef eitthvað spennandi gerist þá er ég opinn fyrir því og þá í samráði við Aftureldingu. Á síðustu árum hafa margir leikmenn Aftureldingar farið út til að takast á við nýjar áskoranir. Sem stendur er ég bara með hugann við landsliðsæfingarnar og Aftureldingu,“ sagði Einar Baldvin Baldvinsson markvörður.
