- Auglýsing -
„Þetta er hrikalega sætt,“ sagði Vignir Stefánsson, leikmaður Vals og nýkrýndur bikarmeistari í handknattleik eftir að Valur vann Fram í úrslitaleik Coca Cola-bikarsins í handknattleik karla í gær, 29:25, í Schenkerhöllinni á Ásvöllum.
„Við höfum núna leikið níu leiki á 30 dögum, allt úrslitaleikir með flottri umgjörð og mikilli pressu. Mér finnst við vera að ljúka ákveðnum kafla í þessari törn. Eftir það tekur síðan við Íslandsmótið í handbolta. En það er gaman hjá okkur og við erum hrikalega ánægðir með sigurinn,“ sagði Vignir ennfremur en sigurinn í gær markaði 11. bikarmeistaratitil Vals í karlaflokki frá því að keppnin hófst 1974 og lauk þá einnig með úrslitaleik Vals og Fram sem Valsmenn unnu, 24:16.
Valur lenti undir 6:0 í byrjun leiks en vann sig hægt og bítandi út úr þeirri stöðu. Vignir sagði þá stöðu ekki hafa verið óskabyrjun í bikarleik. „En við unnum okkur hægt og bítandi út úr þeirri stöðu, með einni og einni vörn og einni og einni sókn. Þetta var bara vinna og niðurstaðan af henni er sæt,“ sagði Vignir Stefánsson, leikmaður nýkrýndra bikarmeistara Vals.
- Auglýsing -
