Mótmælandi hljóp inn á leikvöllinn í Jyske Bank Boxen í Herning í gærkvöldi rétt eftir að síðari hálfleikur í viðureign Dana og Tékka á heimsmeistaramótinu í handknattleik hófst. Mótmælandinn, sem var merktur umhverfisverndarsamtökunum Nødbremsen, hóf að dreifa alskyns litum sneplum, svokölluðu konfetti, um leikvöllinn úr poka sem hann hafði í fórum sínum.
Öryggisverðir á vellinum sváfu á verðinum með þeim afleiðingum að Nikolaj Jacobsen landsliðsþjálfari Dana greip í taumana og ýtti manninum út af leikvellinum.
Jan Kampman starfandi formaður danska handknattleikssambandsins sagði atvikið afar óheppilegt og enn lakar vegna þess að Jacobsen greip í taumana og kom manninum af leikvelli. Nokkuð sem átti að vera verk öryggisvarða sem virtust vera með hugann við annað eða þá að þeir voru einstaklega svifaseinir.
Nokkurra mínútna töf var á leiknum af þessum sökum meðan sneplarnir voru fjarlægðir af keppnisvellinum.
Þrennt tekið höndum
Lögreglan á Jótlandi segir að auk mótmælandans hafi tveir til viðbótar verðir teknir höndum vegna mótmælanna. Nødbremsen, eða neyðarhemillinn, eru dönsk umhverfisverndarsamtök.
Danir unnu leikinn 28:22. Hlynur Leifsson var eftirlitsmaður á leiknum.
