Þýskaland leikur til úrslita á heimsmeistaramóti kvenna í handknattleik á sunnudaginn. Þjóðverjar unnu sannfærandi sigur á Frökkum í undanúrslitaleik í Rotterdam í kvöld, 29:23. Þýska liðið skoraði þrjú síðustu mörk leiksins. Þýskt landslið hefur ekki leikið til úrslita á heimsmeistaramóti kvenna í handknattleik síðan á HM 1993 sem haldið var í Noregi. Frakkland varð heimsmeistari fyrir tveimur árum.
Síðar í kvöld skýrist hvort Þýskaland leikur við Noreg eða Holland í úrslitaleiknum.
Þetta var áttundi sigur þýska landsliðsins á heimsmeistaramótinu en annað tap Frakka sem á leik um bronsverðlaunin á sunnudaginn.
Þjóðverjar voru ákveðnari frá fyrstu mínútu undanúrslitaleiksins í kvöld. Frakkar eltu frá upphafi til enda. Franska liðið minnkaði muninn í eitt mark, 13:12, rétt fyrir lok fyrri hálfleiks.
Antje Döll skoraði níu mörk og var markahæst í þýska landsliðinu. Viola Leuchter og Emily Vogel skoruðu fimm mörk hvor.
Sarah Boukitt og Léna Grandveu skoruðu fimm mörk hvor fyrir franska landsliðið.
Fetar í fótspor móður sinnar
Móðir þýsku landsliðskonunnar, Emily Vogel (áður Bölk), Andrea Bölk, var í sigurliði Þýskalands á HM kvenna fyrir 32 árum. Hvernig sem úrslitaleikurinn fer á sunnudaginn er ljóst að Emily fetar í fótspor móður sinnar með því að leika til úrslita á heimsmeistaramóti.
