Þau tíðindi áttu sér stað í gærkvöld að Þorgeir Haraldsson áhrifamesti og farsælasti forystumaður í íslenskum handknattleik til áratuga lét af embætti formanns handknattleiksdeildar Hauka á aðalfundi sem vitanlega var haldinn á Ásvöllum.
Fáir ef nokkrir stjórnendur handknattleikdeildar á síðustu áratugum hafa haft eins mótandi áhrif á handknattleik og rekstur íþróttarinnar hér á landi og Þorgeir sem gaf ekki kost á sér til endurkjörs.
„Þorgeir á keppnis og stjórnunarferil sem spannar í rúmlega hálfa öld á vettvangi deildarinnar og Knattspyrnufélagsins Hauka. Hann var leikmaður í meistaraflokki, þjálfari bæði meistarflokka karla og kvenna, stjórnarmaður og formaður handknattleiksdeildarinnar og Knattspyrnufélagsins Hauka auk nefndarstarfa á vegum Hauka og víðar. Þorgeiri var á aðalfundinum þökkuð sérlega gifturík störf á vettvangi Handknattleiksdeildar Hauka. Þótt víða væri leitað, má fullyrða að enginn annar formaður handknattleiksdeildar hafi á þessri öld, átt þátt í öðrum eins fjölda meistaratitla líkt og meistaraflokkar Hauka unnu til, svo og fjöldi meistaratitla í yngri flokkum,“ segir m.a. í tilkynningu handknattleiksdeildar Hauka í dag.
Þorkell Magnússon verkfræðingur og fyrrverandi leikmaður handknattleiksliðs Hauka var kjörinn formaður í stað Þorgeirs. Ekki kemur fram hverjir sitja í nýrri stjórn undir forystu Þorkels.
