Heims- og Evrópumeistarar Noregs, undir stjórn Þóris Hergeirssonar, vann þriðja og síðasta örugga sigurinn í C-riðli heimsmeistaramótsins í handknattleik í kvöld þegar liðið lagði Suður Kóreu, 33:23, í DNB Arena í Stafangri. Yfirburðir norska liðsins voru mjög miklir í leiknum og í raun hefði sigurinn getað orðið enn stærri. Staðan í hálfleik var 20:11.
Markvörðurinn þrautreyndi, Katrine Lunde, mætti til leiks í kvöld og stóð í marki norska landsliðsins nær allan leikinn. Ekki var að sjá að Lunde hefði ekki leikið handknattleik í margar vikur. Hún varði 11 skot, 39%. Olivia Lykke Nygaard leysti Lunde af um skeið í markinu. Stórskyttan Nora Mørk kom lítið við sögu og óvíst að hún komi af krafti inn fyrr en líður lengra inn á mótið.
Camilla Herrem var markahæst með sjö mörk og var valin maður leiksins við mikla kátinu heimafólks á áhorfendapöllunum enda um heimakonu að ræða. Herrem býr í Sola og leikur með samnefndu liði. Maren Aardahl, Ingvild Bakkerud og Sanna Solberg-Isaksen skoruðu fjögur mörk hver. Eun Hee Ryu skoraði fimm sinnum fyrir lið Suður-Kóreu.
Austurríki í milliriðla
Fyrr í dag vann Austurríki stórsigur á Grænlandi í sama riðli, 46:23, og tryggði sér sæti í milliriðli sem fram fer í Þrándheimi ásamt norska landsliðinu og Suður Kóreu. Grænland tekur sæti í keppninni um forsetabikarinn.
Spánverjar áfram með fullt hús
Keppni lauk einnig í G-riðli heimsmeistaramótsins sem leikinn var í Frederikshavn. Spánverjar mörðu sigur á Brasilíu, 27:25, eftir að hafa verið undir þegar skammt var til leiksloka. Brasilíska liðið gat jafnað metin á síðustu mínútunni en markvörður spænska liðsins, Darly Zoqbi de Paula, varði skot og sá til þess að spænska liðið náði að skora 27. markið og innsigla sigurinn.
![](https://handbolti.is/wp-content/uploads/2023/12/11874594.jpg)
Brasilíska liðið heldur engu að síður áfram í milliriðlakeppnina eins og Spánn. Úkraína náði þriðja sæti riðilsins með öruggum sigri á Kasakstan, 37:24. Kasakar taka þátt í keppninni um forsetabikarinn.
Danska landsliðið er einnig öruggt um sæti í milliriðlum eftir sigur á Chile, 46:11, í Herning í kvöld. Rúmenar eru einnig öruggir áfram úr riðlinum eftir öruggan sigur á Serbíu, 37:28. Serbar, sem léku vel gegn Dönum í fyrrakvöld, náðu sér ekki á strik í leiknum í dag.