Barcelona vann í dag sinn þriðja sigur á þremur dögum á handknattleiksvellinum þegar liðið sótti Cisne heim til vesturstrandar Spánar. Að vanda var sigurinn öruggur, lokatölur 43:27. Í hálfleik var sjö marka munur, 21:14, Barcelona í vil.
Aron Pálmarsson var ekki í leikmannahópi Barcelona í dag. Hann er væntanlegur til Íslands vegna þátttöku í landsleik Íslands og Litháen á miðvikudagskvöld í Laugardalshöll.
Slóvenski hornamaðurinn Blanz Janc var markahæstur hjá Barcelona í dag ásamt franska heljarmenninu Ludovic Fabregas. Þeir skoruðu sex mörk hvor. Timothey N’Guessan og Mamadou Lamine Diocou skoruðu fimm mörk hvor.
Eins og fyrr segir þá var þetta þriðji sigur Barcelona-liðsins á jafnmörgum dögum. Það vann Aalborg í Meistarardeildinni á fimmtudagskvöldið á heimavelli, 42:33. Leikmenn Benidorm lágu í valnum í gær, 41:28.
Barcelona er með yfirburði í spænsku 1. deildinni með 18 stig eftir níu leiki. Alla leiki sína hefur liðið unnið með miklum yfirburðum.
