Piltarnir í U19 ára landsliðinu töpuðu í dag fyrri viðureigninni við færeyska jafnaldra sína sem fram fór á Eiði í Færeyjum, 36:33. Færeyingar voru marki yfir að loknum fyrri hálfleik, 18:17.
Liðin mætast öðru sinni í Vestmanna á morgun og verður hægt að fylgjast með í streymi á live.hsf.fo. Íslensku piltarnir eru staðráðnir að bíta í skjaldarrendur og leita hefnda í Vestmanna.
Oft í undirtölu – þungur róður
„Varnarleikurinn varð okkur að falli. Við náðum okkur aldrei á strik,“ sagði Heimir Ríkarðsson annar þjálfari íslenska liðsins við handbolta.is fyrir stundu. Hann bætti við að ekki hafi það létt íslenska liðinu róðurinn var vera utan vallar í 16 mínútur á meðan færeyska liðið fékk aðeins eina brottvísun.
„Færeysku piltarinar léku yfirtöluna mjög vel,“ bætti Heimir við
Íslenska liðið fór betur af stað í leiknum í og var yfir, 4:1, eftir um fimm mínútur og hefði í raun átt vera fimm mörkum yfir með betri nýtingu á færum. Færeysku piltarnir unnu sig inn í leikinn og voru komnir mark yfir, 6:5, eftir 10 mínútur.
Heimamenn létu forskotið ekki af hendi. Íslenska liðinu tókst að jafna, 19:19, snemma í síðar hálfleik. Nær komust þeir ekki. Færeyingar voru t.d. með fjögurra marka forskot þegar 10 mínútur voru eftir, 31:27, og aftur 34:30, þegar aðeins fimm mínútur voru eftir af leiktímanum.
Óli Mittún og línumaður Ísak Vedelsbøl reyndust íslenska liðinu afar erfiðir. Þeir félagar unnu vel saman. Óli skoraði alls 11 mörk og Ísak sjö, flest eftir sendingar frá Óla.
Bæði lið eru að búa sig undir þátttöku á heimsmeistaramótinu sem hefst 2. ágúst í Króatíu.
Mörk Íslands: Elmar Erlingsson 10, Hinrik Hugi Heiðarsson 5, Eiður Rafn Valsson 3, Reynir Þór Stefánsson 3, Össur Haraldsson 3, Birkir Snær Steinsson 2, Ívar Bessi Viðarsson 2, Kjartan Þór Júlíusson 2, Skarphéðinn Ívar Einarsson 2, Daníel Örn Guðmundsson 1.
Varin skot: Ísak Steinsson 10, Daði Bergmann Gunnarsson 1.
