Kórónuveirusmit hefur greinst hjá þremur mönnum í herbúðum Íslandsmeistara Vals í handknattleik karla, samkvæmt heimildum handbolta.is. Af þessum sökum fór allur leikmannahópurinn og starfsmenn í skimun síðdegis í dag og er fjöldi manna í sóttkví. Niðurstöður úr sýnatökum eru væntanlegar fyrri hluta dags á morgun og búa menn sig undir að fleiri kunni að vera smitaðir.
Valur lék æfingaleik við KA á föstudaginn. Heimildir handbolta.is herma ennfremur að allir KA-menn sem tóku þátt í leiknum hafi farið í skimun í dag og fengið neikvæða niðurstöðu. KA-menn voru varaðir við um leið og grunur vaknaði um smit innan Valsliðsins.
Valsmenn æfðu ekkert á laugardag og sunnudag. Sá fyrsti af þremur sem greindist mun hafa fundið til einkenna í gær, sunnudag og þá farið rakleitt í sýnatöku. Tveir fylgdu í kjölfarið í sýnatöku. Allir reyndust þeir jákvæðir.
Til stendur að Valur fari til Króatíu á miðvikudaginn og leiki á föstudag og á laugardag við RK Porec í 1. umferð Evrópudeildarinnar. Nær útilokað má telja að þeir leikir fari fram en hugsanlega verður hægt að fresta þeim fram á aðra helgi séu smitin bundin við þá þrjá sem greindust í gærkvöld og í morgun.
