„Það ríkir tilhlökkun hjá okkur fyrir að mæta einu sterkasta liði heims. Markmið okkar er að mæta af fullum krafti í leikinn og gera úr þess alvöru viðureign,“ segir Arnar Pétursson landsliðsþjálfari í samtali við handbolta.is um viðureignina við Svía í undankeppni EM í handknattleik kvenna sem fram fer á Ásvöllum annað kvöld. Flautað verður til leiks klukkan 19.30. Aðgangur verður ókeypis í boði Arion banka.
„Ef við leikum eins og vel og við getum best þá getur orðið um hörkuleik að ræða,“ sagði Arnar ennfremur en leikurinn annað kvöld er sá fyrsti hjá kvennalandsliðinu eftir törnina á heimsmeistaramótinu í lok nóvember og fram eftir desembermánuði.
„Við verðum að líta á þessa viku sem sem við verðum saman í kringum leikina tvo við Svía, heima og að heiman, sem hluta af því að þróa okkar leik áfram svo við komum vel undirbúin í leikina í lokaumferð undankeppninnar eftir mánuð. Okkar bíða tveir leikir eftir mánuð sem ráða því hvort við komumst í lokakeppni EM eða ekki. Undirbúningurinn og leikirnir núna eru mikilvæg fyrir framhaldið,“ segir Arnar Pétursson landsliðsþjálfari í handknattleik kvenna sem hlakkar til að leika fyrir framan fullt hús áhorfenda á Ásvöllum annað kvöld.
Staðan í 7. riðli undankeppni EM:
| Svíþjóð | 2 | 2 | 0 | 0 | 76:37 | 4 |
| Ísland | 2 | 2 | 0 | 0 | 60:37 | 4 |
| Færeyjar | 2 | 0 | 0 | 2 | 43:65 | 0 |
| Lúxemborg | 2 | 0 | 0 | 2 | 31:71 | 0 |
- Síðari leikurinn við Svía fer fram í Karlskrona á laugardaginn og hefst klukkan 13.
- Tvær síðustu viðureigninar verða 3. og 7. apríl gegn Lúxemborg ytra og á við Færeyinga á Ásvöllum 7. apríl. Tvö efstu lið riðilsins verða örugg um sæti í lokakeppni EM sem fram fer í Austurríki, Ungverjalandi og Sviss frá 28. nóvember til 15. desember.
