Handknattleikskonan Tinna Valgerður Gísladóttir hefur gengið til liðs við efsta lið Grill 66-deildarinnar, KA/Þór. Félagaskipti hennar gengu í gegn í morgun og skráð á félagaskiptavef HSÍ.
Um er að ræða lánasamning út keppnistímabilið en Tinna Valgerður er félagsbundin Gróttu. Hún verður gjaldgeng með KA/Þór í kvöld gegn Fram2 í Lambhagahöllinni í lokaleik 9. umferðar Grill 66-deildarinnar. Síðasti leikur Tinnu Valgerðar með Gróttu var einmitt á sama stað á laugardaginn gegn Fram í 10. umferð Olísdeildar.
Tinna Valgerður gekk til liðs við uppeldisfélag sitt, Gróttu, í sumar eftir að hafa búið í Þýskalandi um skeið með, Bjarna Ófeigi Valdimarssyni sem lék með GWD Minden. Bjarni Ófeigur og Tinna Valgerður fluttu heim síðasta sumar. Bjarni Ófeigur samdi við KA en Tinna Valgerður ákvað að leika með Gróttu þrátt fyrir að vera með annan fótinn nyrðra.
Tinna Valgerður, sem er örvhent skytta en getur einnig leikið í hægra horni, hefur skoraði 25 mörk í átta leikjum með Gróttu í Olísdeildinni í vetur. Hún lék með Fram frá 2021 til 2023.
