Tinna Sigurrós Traustadóttir fór hamförum í dag þegar Selfoss fagnaði sínum fyrsta sigri á keppnistímabilinu í Grill 66-deild kvenna í handknattleik. Tinnu héldu engin bönd, það fengu leikmenn Fjölnis/Fylkis að finna fyrir. Hún skoraði 12 mörk og fór fyrir liði Selfoss sem vann með sjö marka mun, 30:23, eftir að hafa verið þremur mörkum yfir í hálfleik, 17:14.
Þetta var ekki aðeins fyrsti sigur Selfoss heldur einnig fyrsta tap Fjölnis/Fylkis-liðsins sem vann tvær fyrstu viðureignir sínar áður en skellt var í lás á Íslandsmótinu í haust.
Eftir því sem kemur fram á Selfoss.net þá lagði Selfoss-liðið grunn að sigrinum með öflugri frammistöðui á fyrsta stundarfjórðungi síðari hálfleiks. Á þeim kafla náðist sjö marka forskot sem aldrei var látið af hendi.
Mörk Selfoss: Tinna Sigurrós Traustadóttir 12, Lara Zidek 5, Agnes Sigurðardóttir 5, Elínborg Katla Þorbjörnsdóttir 4, Ivana Raickovic 2, Kristín Una Hólmarsdóttir 1, Sólveig Ása Brynjarsdóttir 1.
Mörk Fjölnis/Fylkis: Azra Cosic 7, Kolbrún Anna Garðarsdóttir 6, Anna Karen Jónsdóttir 4, Kristín Lísa Friðriksdóttir 2, Eyrún Ósk Hjartardóttir 1, María Ósk Jónsdóttir 1, Ada Kozicka 1, Elsa Karen Þorvaldsdóttir Sæmundsen 1.
Uppfærð staða í deildinni eftir leikina fjóra í dag.
