Sandra Erlingsdóttir og liðsfélagar í TuS Metzingen töpuðu fyrir Borussia Dortmund, 31:21, í oddaleik í átta liða úrslitum þýsku 1. deildarinnar í handknattleik í gær. Leikið var í Dortmund.
Sandra var markahæst hjá TuS Metzingen, skoraði sex mörk, fjögur þeirra úr vítaköstum. Hún átti einnig tvær stoðsendingar.
Leikurinn í gær var ekki síðasti leikur Söndru með TuS Metzingen. Framundan er viðureign við Oldenburg um sæti fimm til átta á föstudaginn á heimavelli.
Samningur Söndru við félagið er að renna úr. Eins og kom fram í fréttum á dögunum flytur Sandra heim til Vestmannaeyja í sumar ásamt sambýlismanni sínum Daníel Þór Ingasyni og ungum syni.
Dortmund heldur áfram í úrslitakeppninni og mætir Blomberg-Lippe í undanúrslitum. Fyrsti leikurinn fer fram í Dortmund laugardaginn 10. maí.
