Tumi Steinn Rúnarsson lék sinn fyrsta leik á keppnistímabilinu með HSC Coburg í þýsku 2. deildinni í kvöld og fór svo sannarlega vel af stað. Hann skoraði fimm mörk, þar af eitt úr vítakasti, þegar Coburg vann á heimavelli liðsmanna Nordhorn, 30:27, eftir að hafa verið tveimur mörkum undir að loknum fyrri hálfleik, 16:14.
Tumi Steinn hefur verið frá keppni síðan flautað var til leiks í þýsku 2. deildinni í lok ágúst. Fyrst var talið að hann væri tognaður á nára en síðar kom í ljós að um kviðslit var ræða. Gekkst Tumi Steinn undir aðgerð vegna kviðslits í október.
Coburg færðist upp í níunda sæti með sigrinum í kvöld. Liðið er með 15 stig að loknum 14 leikjum. Nordhorn er í fimmta sæti með 18 stig.
Sveinn Andri var bestur
Sveinn Andri Sveinsson var markahæstur hjá Empor Rostock í kvöld þegar liðið fékk annað stigið í heimsókn til HSG Konstanz, 32:32. Heimamenn jöfnuðu metin á síðustu sekúndu leiksins.
Sveinn Andri skoraði átta mörk í átta skotum og var maður leiksins. Hann átti einnig tvær stoðsendingar. Hafþór Már Vignisson skoraði tvö mörk í tveimur skotum fyrir Rostockliðið. Akureyringurinn lét einnig til sín taka í vörninni og var tvisvar vísað af leikvelli.
Rostock er áfram í 18. sæti af 20 liðum deildarinnar með sjö stig eftir 14 leiki.
