Unglingalandsliðskonurnar úr Vestmannaeyjum Amelía Dís Einarsdóttir og Þóra Björg Stefánsdóttir hafa ákveðið að söðla um og ganga til liðs við Rival sem er með bækistöðvar í Haugasundi. Íslendingurinn Jörgen Freyr Ólafsson Naabye þjálfar liðið en hann flutti til Haugasunds fyrir ári ásamt Sigrúnu Jóhannsdóttur og tveimur dætrum.
Amelía Dís Einarsdóttir og Þóra Björg Stefánsdóttir hafa leikið með ÍBV, bæði meistaraflokki og 3. flokki auk þess að vera með yngri landsliðunum. Amelía skoraði t.d. 53 mörk í 19 leikjum með ÍBV í Olísdeildinni í vetur. Þóra Björg lék 12 leiki og skoraði 14 mörk.
Samhliða því að leika með liðinu munu Amelía og Þóra sinna þjálfun unglinga og barna hjá félaginu.
Eins og áður segir tók Jörgen Freyr við þjálfun Rival/Nord og HTG fyrir ári eftir að hafa þjálfað meistaraflokkslið FH um nokkurra ára skeið. Undir stjórn Jörgens Freys færðist Rival upp í 3. deild í vor og því bíða ný ævintýri þjálfara og leikmanna á næsta tímabili.
Sigrún, kona Jörgens, leikur með Rival en hún var áður með FH.
Sjá einnig:
Jörgen Freyr þjálfar í Haugasundi næstu árin
