- Auglýsing -
Fyrsti formlegi leikur keppnistímabilsins í handknattleiknum hér á landi fer fram annað kvöld þegar Valur og Haukar mætast í Meistarakeppni HSÍ í karlaflokki í Origohöllinni, heimavelli Íslandsmeistara Vals í handknattleik.
Eftir það tekur við Meistarakeppnin í handknattleik kvenna á sunnudaginn þegar Íslandsmeistarar KA/Þórs taka á móti Fram í KA-heimilinu. Á fimmtudaginn í næstu viku hefst keppni í Coca Cola-bikarnum í karla- og kvennaflokki. Sextán og átta liða úrslit verða þétt leikin á fáeinum dögum.
Eitt og annað þurfa skipuleggjendur handboltaleikja og áhorfendur að hafa í huga vegna leikjanna. Magnús Kári Jónsson starfsmaður HSÍ tók saman það helst sem snýr að áhorfendum eins og staðan er um þessar mundir.
- Heimilt er að hafa að hámarki 200 áhorfendur í einu rými á íþróttaviðburðum að uppfylltum eftirfarandi skilyrðum:
- Allir gestir séu skráðir í númeruð sæti undir nafni, símanúmeri og kennitölu. Skráin skal varðveitt í tvær vikur og eytt að þeim tíma liðnum.
- Allir gestir noti andlitsgrímu (sem hylji nef og munn) á viðburðum innandyra. Einnig þegar farið er inn og út. Grímu má taka niður þegar matar eða drykkjar er neytt.
- Komið verði í veg fyrir frekari hópamyndun fyrir viðburði, í hléi og eftir viðburð.
- Áhorfendasvæði skal vera aðskilið öðrum svæðum og enginn samgangur á milli svæða/rýma ef skipt er upp í rými vegna fjöldatakmarkana.
- Óæskilegt er að deila drykkjarílátum eða mataráhöldum með öðrum einstaklingum. Vatnsbrúsar og önnur drykkjarílát eiga að vera merkt.
- Sé veitingasala til staðar fyrir áhorfendur þarf að huga að aðgengi að handþvottaaðstöðu og handspritti. Veitingasala og önnur sambærileg þjónusta þarf að vera aðskilin fyrir hvert rými. Starfsfólk við slíka þjónustu má ekki fara á milli rýma. Sama á við framreiðsluaðila.
- Brýna þarf fyrir gestum að gæta ýtrustu varkárni og virða reglur um nálægðartakmarkanir og sóttvarnir. Veggspjöld til áminningar eru til sem hægt er að hengja upp.
- Auglýsing -
