U17 ára landslið kvenna í handknattleik beið lægri hlut í síðari vináttulandsleik sínum við Tékka i Prag í kvöld, 28:14. Liðið tapaði einnig fyrri viðureigninni sem fram fór í gær.
Íslenska liðið átti undir brattann að sækja í fyrri hálfleiknum en hálfleikstölur voru 18:6, Tékkum í vil. Slök nýting færa og tæknifeilar sem skiluðu Tékkum hraðaupphlaupum einkenndu íslenska liðið þrátt fyrir að uppstilltur varnarleikur hafi verið góður framan af.
Í seinni hálfeik náðu íslensku stúlkurnar að ljúka sóknum sínum betur en markvarsla tékkneska liðsins gerði íslensku stúlkunum erfitt fyrir. Íslenska liðið tapaði seinni hálfleiknum, 10:8, og mikil batamerki á liðinu miðað við fyrri hálfleik.
Mörk Íslands: Dagmar Guðrún Pálsdóttir 3, Ásthildur Jóna Þórhallsdóttir 3, Lydía Gunnþórsdóttir 3, Ásrún Inga Arnarsdóttir 2, Ágústa Rún Jónasdóttir 1, Guðrún Hekla Traustadóttir 1, Kristbjörg Erlingsdóttir 1.
Varin skot: Ingunn María Brynjarsdóttir 13.
