Íslenska landsliðið í handknattleik karla, skipað leikmönnum 17 ára og yngri, leikur við Norðmenn um 5. sætið á Ólympíudögum Evrópuæskunnar í Maribor í Slóveníu. Loksins hefur verið staðfest að flautað verður til leiks í fyrramálið klukkan 10 að staðartíma, 8 hér heima á Fróni.
Leiktíminn hefur verið á reiki á heimasíðu mótsins og fyrr í kvöld sagði handbolti.is frá öðrum leiktímum sem ekki stóðust þegar allt kom til alls. Fyrir stundu bárust skilaboð frá Stefáni Árnasyni, öðrum þjálfara íslenska liðsins, með niðurnegldum leiktíma.
Vonast menn nú eftir að vakna ekki upp við vondan draum í fyrramálið í Maribor með enn nýjum leiktíma. Lausatök eru á skipulagi Slóvena á Ólympíudögunum og upplýsingar á heimasíðu á tíðum í skötulíki.
Streymi frá leiknum verður m.a. hægt að nálgast á handbolti.is.
Þetta verður önnur viðureign íslenska og norska landsliðsins á mótinu. Liðin mættust í fyrstu umferð riðlakeppninnar á mánudaginn. Íslensku piltarnir unnu, 34:32.
Norðmenn unnu Portúgala, 35:25, í síðari viðureign krossspilsins um fimmta til áttunda sætið í dag en liðin mættust í kjölfarið á sigri íslensku piltanna yfir þeim þeim svartfellsku, 37:30, og sagt er frá hér.
Þýskaland vann Ungverjaland, 31:24, í fyrri undanúrslitleiknum og leikur til úrslita á morgun.
Slóvenar lögðu Króata í hinni viðureign undanúrslita, 50:49, eftir framlengingu og maraþonvítakeppni.
