„Okkur gekk illa að stöðva portúgölsku leikmennina lengi framan af og síðan hikstaði sóknarleikurinn hrikalega hjá okkur framan af síðari hálfleik,“ sagði Heimir Ríkarðsson, þjálfari U19 ára landsliðs karla í samtali við handbolta.is í dag eftir þriggja marka tap, 33:30, fyrir landsliði Portúgal í krossspili um fimmta til áttunda sæti á EM í handknattleik í Króatíu.
„Við vorum bara alltof „soft“ lengi vel í vörninni, bökkuðum undan öllum árásum. Ég hefði viljað sjá menn fastari fyrir, fá fleiri brot og fríköst,“ sagði Heimir og bætti við að varnarleikurinn hafi batnað þegar farið var í 5/1 þegar leið á síðari hálfleik. Þá hafi tekist að rugla taktinn í sóknarleik portúgalska liðsins. Ísland var átta mörkum undir þegar mestu munaði, 25:17.
„Undir lokin áttum við möguleika á að minnka muninn í eitt mark en því miður fórum við illa með þá sókn. Ef við hefðum náð að minnka forskotið niður í eitt mark þá hefði allt getað gerst. Strákarnir voru á fullu en því miður þá féll það ekki með okkur í lokin,“ sagði Heimir ennfremur.
Vel samæft lið
Heimir segir portúgalska liðið vera eitt það besta sem íslenska liðið hafi leikið við í mótinu en þetta var sjötti leikur liðsins á rúmri viku. „Portúgalar hafa verið saman við æfingar í allt sumar og leikið fjölda æfingaleikja, bæði heima og í Frakklandi. Þeir komu því afar vel samspilaðir til mótsins eins og sást vel í þessum leik eins og fleiri hjá þeim í þessu móti.“
Portúgalar skelltu Dönum í fyrradag á sannfærandi hátt, 31:27, og mæta þeim á ný á sunnudaginn í leiknum um 5. sætið.
Nú er að vinna Svía
Niðurstaðan af þessum leik er sú að íslenska liðið leikur við Svía um 7. sætið á sunnudagsmorgun. Verður það annar leikur liðanna á viku en á þriðjudaginn unnu Svíar íslenska liðið, 29:27, í milliriðlakeppninni. „Nú er að taka Svíana í lokaleiknum og ljúka mótinu með bros á vör. Við vorum vonsviknir eftir tapið fyrir þeim á þriðjudaginn og ætlum að bæta fyrir það á sunnudaginn,” sagði Heimir Ríkarðsson, þjálfari U19 ára landsliðsins í samtali við handbolta.is.
