Úkraína og Tékkland hafa tryggt sér keppnisrétt á heimsmeistaramóti kvenna í handknattleik sem haldið verður í Danmörku, Noregi og Svíþjóð í lok nóvember og fram eftir desembermánuði.
Úkraína vann Norður Makedóníu í síðari leik landsliða þjóðanna í umspilinu í kvöld, 31:22, og samanlagt með 11 marka mun, 55:44, í tveimur leikjum. Heimaleikur Úkraínu var háður í Kisvarda í Ungverlandi. Úkraína var í neðri styrkleikaflokki þegar dregið var í umspilið.
Tékkar voru ekki í vandræðum með Svisslendinga í síðari leiknum í umspilinu í kvöld, 36:27, og unnu samanlagt með 10 marka mun, 68:58. Leikurinn í kvöld fór fram í Brno í Tékklandi.
Umspilskeppni Evrópuhluta HM lýkur á morgun með 10 leikjum. Þar á meðal mætir íslenska landsliðið því ungverska í Érd í Ungverjalandi. Viðureignin hefst klukkan 16.15 og fylgist handbolti.is með framvindunni í Érd Arena.
