„Við lékum frábærlega í 45 mínútur í kvöld. Þetta var bara frábær sigur sem undirstrikaði frábæran karakter í liðinu,“ sagði Hrannar Guðmundsson þjálfari Stjörnunnar eftir baráttusigur á Haukum, 23:22, í Mýrinni í kvöld í 13. umferð Olísdeildar karla í handknattleik. Sigurinn færði Stjörnuna upp í níunda sæti deildarinnar þegar sex vikna hlé vegna jóla- og Evrópumóts hlés er innan seilingar.
Stjarnan skoraði ekki mark fyrstu átta míntur leiksins en vann sig síðan jafnt og þétt inn í viðureignina og var fimm mörkum undir í hálfleik, 15:10. Í síðari hálfleik var allt annað upp á teningnum.
„Í leikhléinu fórum við rólega yfir okkar mál og vorum staðráðnir í að gera betur og vinna okkur inn í leikinn. Fara eftir plani. Það gekk að fá þá í þau skot sem við vildum. Einnig náðum við að opna vörn Haukanna. Um leið og það tókst þá gekk þetta hjá okkur,“ sagði Hrannar Guðmundsson þjálfari Stjörnunnar skiljanlega mjög ánægður með sigur í síðasta leik liðsins í Olísdeildinni á árinu en á ýmsu hefur gengið hjá Stjörnunni í haust og árangur ekki alveg á pari við væntingar.
Staðan í Olísdeildum og næstu leikir.
