Ungverska landsliðið, sem það íslenska mætir í riðlakeppni Evrópumótsins í handknattleik síðar í þessum mánuði, átti ekki í vandræðum með rúmenska landsliðið í vináttuleik í Ungverjalandi. Eftir að hafa verið sex mörkum yfir í hálfleik, 17:11, fögnuðu leikmenn ungverska landsliðsins 10 marka sigri, 33:23.
Viðureignin var aðeins jöfn fyrsta stundarfjórðunginn. Rúmenska landsliðið, sem tapaði fyrir ítalska landsliðinu á þriðjudagskvöldið, 35:34, í Triesete, sá aldrei til sólar í vetrarkuldanum í Ungverjalandi. Heimamenn voru með níu til tíu marka forskot allan síðari hálfleikinn.
Eftir því sem næst verður komist leikur ungverska landsliðið ekki fleiri vináttuleiki fyrir Evrópumótið.
László Bartucz átti stórleik í ungverska markinu, varði 11 af 23 skotum sem hann fékk á sig.
Miklós Rosta var markahæstur hjá Ungverjum með sex mörk. Bence Krakovszki og Pedro Rodriguez skoruðu fjögur mörk hvor.
Daniel Stanciuc var atkvæðamestur hjá Rúmenum með átta mörk.
EM karla 2026 – leikdagar, leikstaðir, leiktímar
