Annan daginn í röð unnu Viktor Gísli Hallgrímsson og samherjar í danska bikarmeistaraliðinu GOG liðsmenn Tatabanya í D-riðli Evrópudeildarinnar í handknattleik. Í kvöld vann GOG með tveggja marka mun, 30:28, eftir jafna stöðu að loknum fyrri hálfleik, 15:15. Leikið var á heimavelli Tatabanya í Györ í Ungverjalandi.
Viktor Gísli varði 14 skot í leiknum í kvöld, sem gerir 34% hlutfallsmarkvörslu. Simon Pytlick var markahæstur hjá GOG-liðinu með átta mörk. Zsolt Ballogh skoraði einnig átta mörk fyrir Tatabanya
Misskilnings gætti í umfjöllun hanbolta.is í morgun í samantekt um leikina sem fram fóru í Evrópudeildinni í gærkvöld. Þar sagði að Viktor Gísli hefði ekki varið eitt einasta skot í sigri GOG á Tatabanya, 35:32. Hið rétta er að piltur varði átta skot. Rétt skal vera rétt.
