Arnar Pétursson þjálfari kvennalandsliðsins í handknattleik og Ágúst Þór Jóhannsson, aðstoðarþjálfari, hafa skrifað undir nýjan þriggja ára samning við Handknattleikssamband Íslands (HSÍ) um þjálfun landsliðsins.
Guðmundur B. Ólafsson, formaður HSÍ, greindi frá þessu á blaðamannafundi í hádeginu í dag. Um leið var upplýst að Anna Úrsúla Guðmundsdóttir og Hrafnhildur Ósk Skúladóttir hafi verið ráðnar inn í þjálfararteymi landsliðsins og hafi B-landsliðið á sinni könnu með Arnari og Ágústi Þór. Hlynur Morthens verður áfram markvarðaþjálfari landsliðsins.
„Við væntum mikils af þessu fólki nú þegar ákvörðun hefur verið tekin um að halda áfram þeirri uppbyggingu sem hefur staðið yfir,“ sagði Guðmundur á blaðamannafundinum. „Það hafa orðið framfarir hjá liðinu og það er von okkar að áfram verði haldið á þeirri braut. Um leið setjum við á fót B-landslið sem mun auka breiddina í landsliðshópnum sem styrkir okkur til að takast á við stærri verkefni í framtíðinni.“
Arnar tók við þjálfun kvennalandsliðsins sumarið 2019 af Axel Stefánssyni.
Framundan eru þátttaka í undankeppni Evrópumótsins en hún hefst í næsta mánuði með leikjum við Svía í Eskilstuna 7. október og gegn Serbum hér heima þremur dögum síðan.
A- og B-landslið kvenna taka þátt í æfingamóti í Tékklandi síðla í nóvember ásamt landsliðum Tékklands, Noregs og Svíþjóðar. Undankeppni EM heldur áfram í mars en henni lýkur næsta vor.
