„Mér fannst varnarleikurinn fara úrskeiðis í kvöld. Við vorum ekki nógu þéttar sem varð til þess að Svartfellingar fengu of mörg auðveld mörk,“ sagði Þórey Anna Ásgeirsdóttir landsliðskona í samtali við handbolta.is eftir tapleikinn, 36:27, fyrir Svartfellingum í milliriðlakeppni heimsmeistaramótsins í handknattleik kvenna í Westfalenhallen í Dortmund.
„Fyrstu tíu mínúturnar í síðari hálfleik fóru með leikinn. Þá skoruðu þær full auðveld mörg,“ sagði Þórey Anna en Svartfellingar breyttu stöðunni úr 14:11 í 22:14, á tíu fyrstu mínútum síðari hálfleiks.
„Því miður tókst okkur ekki að fylgja eftir góðum kafla í lok fyrri hálfleiks. Það vantaði orkuna í okkur sem hefur verið með í síðustu leikjum. Við vorum að elta nær allan leikinn.
Þessi frammistaða var heldur betur undir væntingum. Það hefði verið frábært að ná góðum úrslitum í kvöld en sú varð ekki raunin,“ sagði Þórey Anna Ásgeirsdóttir landsliðskona í viðtali við handbolta.is.
Lengra viðtal við Þóreyju Önnu er að finna í myndskeiðinu hér fyrir ofan.
Slakur leikur og átta marka tap í Westfalenhallen
