Ívar Benediktsson skrifar frá Tíblisi, [email protected]
Veikindi farþega um borð í flugvélinni sem flutti íslenska landsliðið í handknattleik karla frá München í Þýskalandi til Tíblisi í Georgíu seint í gærkvöld var þess valdandi að landsliðið kom hálfum öðrum tíma síðar til Tíblisi en gert var ráð fyrir. Lenda varð vélinni vegna veikindanna í Búkarest í Rúmeníu og staldrað þar við í 75 mínútur. Eftir að lagt var af stað frá rúmensku höfuðborginni liðu tvær stundur og 15 mínútur uns lent var á alþjóðflugvellinum í Tíblisi undir birtingu.
Mjög þröngt var í flugvélinni og hvert og eitt af 228 sætum var setið. Hluta biðtímans í Búkarest var farþegum ekki heimilt að standa upp úr sætum sínum.
Ferðalúnir
Það voru því ferðlúnir leikmenn, þjálfarar og starfsmenn landsliðsins sem bókuðu sig inn á Holiday Inn hótel í miðborg Tíblisi klukkan hálf átta í morgun að staðartíma, hálf fjögur heima á Íslandi. Var um sólarhringur liðin síðan rúta sem flutti hópinn frá Reykjavík til Keflavíkurflugvallar lagði af stað úr Laugardal. Að loknum árbít lögðust allir til hvílu.
Hádegisverður verðu borinn fram klukkan 14 áður en fundað verður fyrir æfingu sem hefst í keppnishöllinni klukkan 17, 13 að íslenskum tíma.
Ferðalag íslenska landsliðsins til Georgíu er vegna viðureignar liða þjóðanna í undankeppni EM sem fram fer í Tíbilisi Arena á morgun sunnudag. Flautað verður til leiks klukkan 14 að íslenskum tíma.
