Það verður engin þrettándagleði með stórsteik, malti og appelsíni og fjölskyldusamveru hjá handknattleiksdómurunum Svavari Ólafi Péturssyni og Sigurði Hirti Þrastarsyni. Þeir félagar verða í Mosonmagyaróvár í Ungverjalandi á þrettánda degi jóla þar sem þeir hafa tekið að sér að dæma viðureign Motherson Mosonmagyarovari KC og rúmenska liðsins CSM Targu Jiu í fyrstu umferð riðlakeppni Evrópudeildar kvenna í handknattleik.
Sigurður og Svavar hafa dæmt nokkra leiki í Evrópudeild karla á leiktíðinni auk landsleikja og tekist svo vel upp að þeir verða kallaðir til starfa með spjöld sín og flautur um leið og riðlakeppni Evrópudeildar kvenna hefst. Svavar og Sigurður dæmdu í gærkvöld síðasta leik ársins Olísdeild karla á milli Aftureldingar og Vals.
Mosonmagyarovari KC og CSM Targu Jiu eru í D-riðli ásamt Costa de Sol Málaga, sem ÍBV mætti í átta liða úrslitum Evrópubikarkeppninnar fyrir tveimur árum, og norska liðinu Sola HK, við Stavangur. Norska landsliðskona Camilla Herrem hefur leikið með Sola um árabil.
Alls leika 16 lið í riðlakeppni Evrópudeildarinnar. Danska liðið Ikast, sem nú á sæti í Meistaradeildinni, vann Evrópudeildina í vor eftir úrslitaleik við Nykøbing Falster.
