„Við hlökkum til að byrja eftir góðan undirbúning. Ég er viss um að við erum klárir í slaginn,“ sagði Ómar Ingi Magnússon, landsliðsmaður í handknattleik og nýbakaður íþróttamaður ársins þegar handbolti.is hitti hann stuttlega að máli áður en íslenska landsliðið fór á sína fyrstu æfingu í nýrri og afar glæsilegri íþróttahöll í Búdapest, MVM Dome þar sem leikir íslenska landsliðsins á Evrópumótinu fara fram.
Fyrsta viðureign íslenska landsliðsins verður annað kvöld klukkan 19.30 gegn landsliði Portúgal. „Uppleggið fyrir fyrsta leikinn liggur fyrir. Nú er það í okkar höndum að vinna eftir því,“ sagði Ómar Ingi ennfremur.
Legið yfir síðustu leikjum
Ómar Ingi sagði að vel hafi verið farið yfir síðustu leiki Íslands og Portúgal, þar á meðal viðureignina á heimsmeistaramótinu í Egyptalandi í fyrra. Þá mættust liðin einnig í upphafsleik sínum á mótinu. Portúgal vann sannfærandi sigur.
Þurfum að ná stjórninni
„Við höfum fengið góða mynd af leik þeirra. Portúgalska liðið hefur innan sinna raða marga gæða leikmenn auk þess sem skipulagið er mjög gott. Við verðum að ná stjórninni í þeim efnum. Varnarleikurinn er góður. Leikmenn eru mjög hreyfanlegir og reyna mikið að fiska boltann af andstæðingnum. Við verðum að vera mjög klókir og útsjónarsamir,“ sagði Ómar Ingi.
Spurður um vonir og væntingar hans til mótsins sagði Ómar Ingi að best væri að horfa til eins leiks í einu. „Það eru tækifæri fyrir hendi. Ef við leikum af einbeitingu frá fyrsta leik þá eru okkur allir vegir færir. Það er alltaf pressa á manni, bæði frá umhverfinu og mér sjálfum,“ sagði Ómar Ingi Magnússon, landsliðsmaður og íþróttamaður ársins 2021.
